PARA SA MALIGAYANG ARAW NG MGA INA
Ni: MaDittz
Madalas kong pakaisipin
Saang bahagi ng paninimdim
Ang ulila na sa Inang di kapiling
Ang buhay ay sadya nang kaydilim.
May mga gabing luha ay nangingilid
Pilit binabalikan alaalang nakapinid
Mga yakap at halik na di tinipid
Laging hanap ng pusong sa lungkot tigib.
Nasaan ka man ngayon, aming NANAY
Mga pangaral mo lagi naming gabay
Ibinilin sa amin na dapat ding ibigay
Sa mga supling at apo, may lambing na alay.
Sa araw ng mga INA, lagi kang dinadakila
Init ng pagmamahal, pangarap muling madama
Subali’t ngayong ikaw ay payapa na
Tanging alaala ang lumipas na ligaya.
Ako ngayon ay isang INA rin
Sinisikap na ikaw ay tularan din
Maging laging ilaw ng tahanan namin
Na di hahayaang maging madilim.
Salamat, NANAY, salamat
Pagpupugay ay nararapat
Ikaw ay walang katapat
Pag-ibig ay di masusukat.