Para sa mga kababaihan
Ni: Ibarra Banaag
Sa araw na ito
Halina at makiisang baguhin
Tema't laman ng talumpati
Sigaw at mga panawagan
Kababaihang nagpupunyagi.
Di na sasapat ang paggunita
At hungkag na mga pagkilala
Ng mga gawang plake at tula
Kung nakukulapulan ng mantsa.
Tama na ang awitin at sayaw
Selebrasyong pulos paimbabaw
Kung ang balita sa araw-araw
Ay mga babaeng nilalapastangan
'Wag gamitin ang pekeng parangal
'Pag galing sa mga walang dangal
Na turing sa kanila ay isang bagay
O puntod na taunang dinadalaw
Ang paggunita ay pagsasabuhay
Ng bawat hiningang nagsipag-alay
Kumasa at nagbigay ng bigwas
Sa sakmal ng kadena ay kumalas.
Ang lalim at diwa ay matatanto
Kung umalpas na sa lugmok
O humupa na ang pag-aalimpuyo
Kababaihang dapat ginagalang.
Ibarra Banaag
Comments